Johansen, P., Asmund, G., Rigét, F. & Schledermann, H. 2010: Environmental monitoring at the cryolite mine in Ivittuut, South Greenland, in 2010. National Environmental Research Institute, Aarhus University. 34 pp. – NERI Technical Report No. 812.
Ivittuuni Kujataani Arsuup Kangerluani ittumi 1854-imiit 1987-imut orsugiak piiarneqarlunilu, immikkoortiterneqarlunilu aallarussorneqarpoq. Orsugiassiorneq pissutigalugu kangerluk aqerlumik zinkimillu mingutsinneqarsimavoq. Mingutsitsinerup aallaavii tassaanerupput ujaqqat eqqakkat, akuiarnerlukunik taaneqartartut orsugiassiorfimmeersut. Ujaqqat taakku Ivittuut sineriaanut nunniutigineqarsimapput. Taakku aqerlumik zinkimillu akoqarput taakkulu arrorlutik ulittarnermit Arsuup Kangerluanut siammarterneqartarlutik.
Tamaani mingutsitsineq 1982-imili malinnaavigineqalerpoq. 1985-imiit qeqqussat (equutit) uillullu kimik malinnaavigineqalerput siusinnerusukkut misissuisarnerni paasinarsereersimammat kangerluup aalisagai raajaalu aqerlumik zinkimillu akunissimanngitsut. Nalunaarusiami matumani misissuineq kingulleq 2010-imi juulimi ingerlanneqartoq nassuiarneqarpoq.
Akuiarnerlukut (tuluttut taaneqartartut ”waste rock”) Ivittuut sissaanut qimagarneqarsimasut annerusumik suli mingutsitsisuunerat Qeqqusat uilullu aqerlumik zinkimillu sumiiffinni assigiinngitsuni assigiinngitsunik akoqassusiisigut malunnarpoq.
Arsuup Kangerluani kangiata tungaani Ivittuut eqqaanni sineriammi 4 kilometerinik isorartutigisumi qeqqussat qaffasinnerusumik aqerlortaqarput, Arsuulli kangerluani misissuiffiusuni amerlanerpaani qeqqussat qaffasinnerusumik zinkitaqarlutik. Uillut Arsuup Kangerluani misissuiffiusuni tamani qaffasinnerusumik aqerlortaqarput kiisalu kangerluup avataani aamma sumiiffinni 3-4 kilometerinik ungasissusilinni taamaallutik. Ivittuuni namminermi taamaallaat uillut zinkitaqarnerupput.
Ivittuut eqqaanni sineriammi 5 kilometerit missaanni isorartutigisumi uillut ima aqerlortaqartigipput nereqquneqaratik. 2007-imi misissuinermi paasisatulli tamanna annertutigaaq 2004-imili misissuinermit annikinnerutsiarluni, aammalu 1982-1992-mi nassaarfigineqartumit minnerujussuulluni. Taamanikkut Arsuup Kangerluata kitaa tungaa aamma ilaagaluarpoq.
Piffissaq misissuiffiusoq tamaat isigaanni (1982-imiit 2010-mut) Arsuup Kangerluani qeqqussat uillullu aqerlortaat milliartorsimapput. Aqerloqassusii 1982-imiit agguaqatigiissillugu pingasoriaammik annikillisimapput. Qeqqussat uillullu zinkeqassusiat appariarsimavoq, aqerlulli appariarneratut annertutinngitsumik.
Full report in PDF-format (2,98 MB).
