Glahder, Chritian M., Asmund, Gert. 2007. Faglig rapport fra DMU nr. 614. 28 s.
Eqikkaaneq
Pingajussaanik nakkutilliilluni misissuineq una Kalaallit Nunaata kujataani, Nanortallip kommuniani Nalunap eqqaani ingerlanneqarpoq 2006-imi augustusip aappaaniit qulingiluaanut. 2005-imimili august-septemberimi nakkutilliilluni misissuisoqarmat nakuutilliilluni misissuinerup uuma tungaanut pingasoriarluni aatsitassamik Spaniamut nassiussisoqarpoq, tasamani kuulti immikkoortinneqassammat.
Uillut, equutit kanajorlu nalinginnaasoq Napasorsuup iterlaani misissuiffinni assigiinngitsuni sisamat-tallimani katersorneqarput, eqaluit sisujuitsut Napasorsuup kuuani aalisarneqarput aammalu orsuaasat snekruslav Cetraria nivalis Napasorsuup qooruani iterlaallu sineriaani misissuiffinni assigiinngitsuni 20-ni katersorneqarlutik (Ass. 1). Misissugassatut katersukkat pinngoqqaatinik aqqaneq marlunnik (Hg, Cd, Pb, Zn, Cu, Cr, Ni, As, Se, Co, Mo aamma Au) akoqarnersut misissoqqissaarneqarput inernerilu aallaavigisatut tunuliaqutarineqartunut nalunaarsuillunilu siusinnersukkut marloriarluni 1998-2001-imut aammalu 2004-mi 2005-imilu misissuisimanerni paasisanut sanilliussuunneqarlutik.
Uilluni kanasswullu tinguini akuusut annertunerulersimanngitsut paasineqarpoq, equutinili Co katersuiffinni marlunni annertusiallalaarsimasoq paasineqarluni. Taamaattumik qaffariaatit nassaarineqartut Napasorsuup iterlaani annikitsuinnaallutik, tamannalu immami avatangiisit 2006-imi annikitsuinnarmik sunnerneqarsimanerannut takussutissaavoq. 2004-mi 2005-imilu pingaartumik equutit annertujaarsuarmik akoqarnerulersimaneranut sanilliukkaanni sunnerneqarsimaneq 2004-miit 2006-imut annikilliartuaarsimavoq.
Eqaluit sisujuitsut tinguini akuusoq avatangiisini aallaavigalugu tunuliaqutarineqartumut naleqqiullugu Cd marloriaammik qaffariarsimavoq. 2004-mi Cr aamma Co aallaavigalugu tunuliaqutarineqartumit marloriaataasimavoq kisiannili 2005-imi annertuseriarnermik malussartoqanngilaq. Taamaalilluni ukiuni pingasuni misissuiffiusuni Cr, Cd aamma Co annikitsuinnarmik qaffariarsimasut paasineqarpoq.
Ujaqqanik sequtsigaasiviup eqqaani, aqqusernup sinaani sulisullu ineqarfiata aatsitassarsiorfiullu eqqaanni Cu, Cr, As aamma Co orsuaasani akuusut, aallaavigalugu tunuliaqutarineqartumut sanilliullugu marloriaatip 15-eriaatillu akornanni qaffasinneruvoq. Taakkunani marlunni 2006-imi akuusut 2005-imit allaarujussuanngillat. Saffiugassat sisamat taakkua orsuaasani ujaqqanik aserortigaasivimmeersuni malunnartumik tammaarsimaffiup eqqaaneersunit annikinnerupput. 2005-imi arsen kisimi malunnartumik ujaqqanik aserortigaasivimmi annikinnerusimagaluarpoq. Cu, Cr aamma Co-mik aqqusinermiit sunnersimaneqarneq 2006-imi malunnartumik 2005-imiit annikinneruvoq, kisiannili 2005-imisulli aqqusinermiit <st1:metricconverter w:st="on" ProductID="1000 m">1000 m</st1:metricconverter> ungasitsigisoq tikkillugu aallaavigalugu tunuliaqutarineqartumut sanilliullugu qaffasinnerusoq nassarineqarsinnaalluni.
Ukiuni marlunni siuliinisulli 2006-imi avatangiisit tamaaniittut aatsitassarsiornermit sunnersimaneqarput. Sunnersimaneqarneq, pingaartumik pujoralammit siaruarterneqartumit pisoq, pingaartumik Napasorsuup qooruani malunnarpoq. Aqqusinermiit sunnersimaneqarneq 2006-imi 2005-imiit annikinneruvoq. Napasorsuup kuuani iterlammilu annertuseriarnerit ikitsuinnaapput aammalu sumiiffik sunnersimaneqartoq 2006-imi ukiunut siuliinut marlunnut sanilliullugu minnerulluni.
Inassutigineqassaaq ukiup ingerlanerani assigiinngitsuniit pujoralatitsineq ukiumiit ukiumut saffiugassat orsuaasani akuussut annertussusiisa misissorneqartarneratigut nalilersorneqartassasoq. Tamanna pisinnaavoq orsuaasanik nunamit sunnerneqarsimanngitsuneersunik Nalunap eqqaanut sumiiffinnut assigiinngitsunut tallimaniit qulinut amerlassusilinnut ukiut tamaasa nuutsisarnikkut.
