Glahder, C.M. & Asmund, G. 2005. Technical Report from NERI no. 567, 37 pp.

Eqikkaaneq

Piffissaq nalunaarsuiffik

Nalunaarsuineq Kujataani, Nanortallup kommuniani, Nalunami, 2005-imi 10. augustusimiit 5. septemberimut ingerlanneqarpoq. 2004-mi augustusimi siullermeerluni nalunaarsuinerup kingornagut sisamariarluni aatsitassamik aallarussineqarpoq.

Katersuinissamik misissuinissamillu pilersaarut

Uillut, equutit kanajorlu nalinginnaasoq Napasorsuup Iterlaani-imi assigiinngitsuni 2-5-ini misissugassatut katersorneqarput, eqaluit sisujuitsut Napasorsuup kuuani pisarineqarput orsuaasarlu snekruslav, Cetraria nivalis Napasorsuup Qooruani sineriammilu assigiinngitsuni 20-ni katersorneqarluni. Misissugassat grundstoffinik 12-inik (Hg, Cd, Pb, Zn, Cu, Cr, Ni, As, Se, Co, Mo aamma Au) misissuiffigineqarput misissuinerullu inerneri tunngavigineqartumi pissutsinut naleqqiussuunneqarlutik. Nunap tamatuma tamakkerluni mingutsinneqarnerata annertussusianik takussutissaq pissarsiarineqarpoq agguaqatigiissitsinikkut, misissuiffiulli ilaani aalajangersuni mingutitsineq pissarsiarineqarluni stationimi annertussutsit tunngavigalugit.

Misissuiffik tamakkerlugu: Agguaqatigiissitsinikkut Cu, As aamma Co annertusisimapput 

Taamaallaat orsuaasani Cu, As aamma Co agguaqatigiissillugu annertunerulersimapput (marloriaammiit tallimariaammut) tunngavigineqartumi pissutsinut naleqqiullugit. Uumassusilinni allani grundstofit agguaqatigiissitsinikkut annertussutsinit annertunerulersimanngillat.

Misissuiffimmi aalajangersumi: Imaq piiaavimmit nunniukkamillu sunnersimaneqarpoq

Qeqqussat Napasorsuup Iterlaaniittut, Napasorsuup Kuuata qanittuaniittut aammalu nunniukkap qanittuaniittut annikitsumik Zn aamma Co-mik akoqarnerulaalersimapput kuullu qanittuaniittut Cr-imik akoqarnerulersimallutik. Tamatumuuna takuneqarsinnaavoq sunniutit aatsitassarsiorfeqarfimmeersuusut (soorlu imeq aatsitassarsiorfimmeersoq aammalu qaqqap qasertup aserorterneqarneraneersoq) aammalu aatsitassamik usilersuiffeqarfimmeerlutik. Akuusut annertunerulersimanerannut aamma aqqusernup pujoralaa pisooqataasinnaavoq.

Misissuiffimmi aalajangersumi: Imeq

Eqaluit sisujuitsut tinguini akuusut annertunerulersimanngillat.

Misissuiffimmi aalajangersumi: Nunami avatangiisit aqqusernup aatsitassarsiorfiullu pujoralaannit sunnersimaneqarput

Napasorsuup Qooruani Iterlaanilu nunniukkami, aatsitassarsiorfimmi qorlortumi taakkualu eqqaanni qanittuni orsuaasat misissukkat Cu, Cr, As aamma Co-mik 5-16-eriaammik akoqarnerupput. Napasorsuup Qooruata annersaani orsuaasat akoqarnerulersimanerat aqqusernup qallersugaanngitsup pujoralaanik pissuteqarpoq. Tamannalu ilaatigut qaqqap qasertup aserorterneqarneranmit allanngutsaalineqarpoq. Akoqarnerulersimanerit aqqusinermit 1000 meter miss. ungasissusilik tikillugu malugineqarsinnaapput. Akoqarnerulersitsisunut ilaagunarpoq tammaarsimaafeqarfik, tamatumunngalu pissutaagunarluni qaqqap qasertup aserorterneqarneranit aatsitassarsiorfimmullu aqqusinerni angallannermit.

Annertunngitsumik najukkami mingutsitsineq

Soorlu 2004-mi nalunaarsuinermut atatillugu takuneqareersoq najugaq tamanna aatsitassarsiorfimmit sunnersimaneqarpoq. Annikitsumik akoqarnerulersimanerit nassaarineqarsinnaapput Napasorsuup Kuuata akuani sinerissami 5 km miss. isorartutigisumi. 2004-mut naleqqiullugu imaq sunnersimaneqartoq annikinnerulersimavoq. Tamanna aatsitassap seqummarissup siusinnerusukkut tamaaniissimasup misissuinerup uuma siornagut aallarussorneqarsimaneranik pissuteqarsinnaavoq. Napasorsuup Qoorua pingaartumik aqqusernup pujoralaanit sunnersimaneqarpoq, aammalumi tammaarfimmi aatsitassarsiornermit. 2004-mut naleqqiullu akuusuni taamaattaat As 2005-imi annertuneruvoq.

 

Malittarisassaliuussisinnaaneq 

Aqqusinermiit aatsitassarsiorfimmiillu pujoralaap siaruarternerata pinngitsoorniarnissaa ingerlatsivimmut oqaloqatigiissutigineqartariaqarpoq. Qaqqap qasertup aqqusinermik aserfallatsaaliinermut atorneqarnera isumaliutigeqqinneqartariaqarpoq qaqqaq qasertumillu aammalu siornatigut aqqusinniornermi atorneqarsimasut naasuitsulerinikkut misissuinernik tamanna tunngaveqartinneqartariaqarluni. Pujoralak annikillisinneqarsinnaavoq nunap panernerani aqqusernup masatsertarneratigut.

 

Nalunaarut tamaat pdf-format-inngorlugu (683 kB; in English).