Eqikkaaneq

 

Nalunaarusiaq una Avannaarsuani Tunumilu Nunami Allangutsaaliukkami pinngortitap uumasullu siunissami nakkutigineqarlutik ingerlanneqarnissaannut iseriutissaavoq. Nalunaarusiaq suliarineqarpoq pilersaarusiaq "Strategiplan for Nationalparken/Biosfære-området i Nord- og Østgrønland", Naalakkersuisut 2004-mi ukiakkut akuersissutigisaat naapertorlugu. Nalunaarusiami aamma Nunap eqqissisimatitap kujataa avannarpasissuseq 70° tikillugu ilanngunneqarpoq.

 

Nalunaarusiap immikkoortui pingaarnerit tassaapput:

• Canadami, Alaskami aamma Svalbardimi issittumi avannarlermi nunat eqqissisimatitat nakkutigineqarlutik aqunneqarneri pillugit naatsumik takussutissiaq.
• Sumiiffini tamakkunani ingerlassat sunniutigisinnaasaat pingaarnerit kiisalu sakkut pinngortitamut uumasunullu sunniutit pitsaanngitsut annikillisarnissaannut atorneqarsinnaasut pillugit takussutissiaq.
• Tamaani uumasuusut pingaarnerpaat pillugit takussutissiaq.
• Mianernartut.

 

Sunniutit pitsaanngitsut pingaarnerit tassaapput uumasoqassusianik akornusersuineq naasunillu nungullarsaaneq. Sunniutit annerpaat aatsitassanik ikummatissanillu piiaanermut aamma takornariartitsinermut aallaavinnik anginerusunik pilersitsinermut, kiisalu tamakkununnga assingusunik ataavarnerusussanik pilersitsinermut atatillugu pisarumaartut ilimagineqarsinnaavoq.

 

Nalunaarusiamut ilaatinneqarpoq CD sammisanik GIS-temanik pinngortitamut uumasunullu tunngasunik imalik. Sammisat tamakku Namminersornerullutik Oqartussat siunissami nakkutiginnillutik ingerlatsinissaminni sumiiffinni aalajangersimasuni ingerlatsinikkut aporaaffiit suunerisa paasiniarnerini atortarsinnaavaat. Aporaaffiit taammaattut arlalitsigut ingerlanniakkat piffissaq initussuserlu eqqarsaatigalugit naapertuuttumik aaqqissuunneqarnerisigut annikillilerneqarsinnaasarput. Qaleriaat GIS-lagit tamarmik Avatangiisinut Pinngortitamullu Pisortaqarfiup kissaatai naapertorlugit MapInfo’mit suliaapput.

 

Pinngortitap uumasullu qiterisaasa immikkut pingaarutillit suunerisa paasinissaasa pingaartuunerat nalunaarusiami tikkuarparput. Pingaartumik ingerlassat aalajangersimasut pinngortitamut sunniutaasa nalilersornissaat siunertaralugu naammattunik ilisimasaqarnissaq qulakkeerniartariaqarpoq. Sumiiffiit 15-it ilisimariikkat tunngavigalugit immikkut pingaarutilittut isigisariaqartut nalunaarusiami tikkuartorneqarput. Nuna allanngutsaaliugaq pillugu ilisimasat ataatsimut isigalugit killilerujussuupput, pingaartumilli sumiiffinni tikkuarneqartuni ingerlassanik annertunerusunik aallartitsisoqartinnagu tunuliaqutaasunik misissuinissaq ilisimasanillu nutarterinissaq pisariaqarput.

 

Hele rapporten  i pdf format (13,180 kB).