Møller EF, Juul-Pedersen T, Mohn C, Dalgaard MA, Holding J, Sejr M, Schultz M, Lemcke S, Ratcliffe N, Garbus SE, Clausen DS, Mosbech A. 2019. Identification of offshore hot spots. An integrated biological oceanographic survey focusing on biodiversity, productivity and food chain relations. Aarhus University, DCE – Danish Centre for Environment and Energy, 65 pp. Scientific Report No. 357. http://dce2.au.dk/pub/SR357.pdf
Kalaallit Nunaata kangiani avatangiisini misissuinerup ilaattut 2017-imi august-septemberimi sapaatini akunnerni pingasuni danskit umiarsuaannik ilisimatuussutsikkut misissuummik Danamik ilisimatusartoqarpoq. Ilisimatusartut 20-t peqataapput uumasoqarfiusunilu 82-ini 2° W-imi, 20° W-imi, 74.5° N-imi 79° N-imilu, pingaartumik immap naqqata nunavimmut atasortaata killingani, imarmi 100-400-nik ititigisumi itinerusunilu misileraasoqarluni. Imaq immap qaavaniik 100 meterinut ititigisup annerpaartaa imermik avannaaneersumik akoqarpoq, itinerusorli atlantikup imertaanik annerusumik akoqarluni kiisalu immap naqqata nunavimmut atasortaata killinga atuarlugu aporaaffiusoq allanngorartuuvoq. Aammattaaq immap qaava inuussutissakitsuaraavoq. Sumiiffimmi sarfaq inuussutissallu uumassusilinnut pingaaruteqarluinnarsimavoq. Immap naqqata nunavimmut atasortaata killingata itisuullu akornanni immap qaavani akulerussuuttoqarnerani naasut tappiorannartut pingaartumik pinngortarsimapput. Nerisariiaanni tullernguuttuni tassa uumasuni tappiorannartuni tamanna aamma atuussimavoq. Taamatuttaaq Issittup imartaani issittumi uumassusillit amerlanerusut illuatungaanili Kalaallit Nunaata imartaani imarmut itisuumut qaninnerusuni issittumi uumasusilinnit sunnertisimanerusut takuneqarluarsinnaasimavoq. Immap qaavani uumasut tappiorannartut pingaartumik uumapput, taakkualu uumasunut taakkuninnga nerisaqartunut soorlu timmissanut, aalisakkanut arfivinnullu pingaaruteqarluinnarput. Timmissat imaanilu miluumasut assigiinngisitaarnerat amerlassusaallu annikitsuaraasimapput. Appaliarsuit amerlanerpaasimapput sumiiffinnilu tappiorannartunik annertuumik naasoqarfiusuni siumorneqartarsimallutik. Timmiakuluit taateraallu sumiiffimmi siaruarsimapput ikitsuinnaasimallutillu. Appat ikitsuinnaat siumorneqarsimapput kangimullu ingerlaassangatinneqarlutik.
