Aarhus University Seal / Aarhus Universitets segl

Nr. 110: Seabird baseline studies in Baffin Bay, 2008-2013

Frederiksen, M., Falk, K., Huffeldt, N.P., Johansen, K., Labansen, A.L., Linnebjerg, J.F., Merkel, F., Mosbech, A. 2014. Seabird baseline studies in Baffin Bay, 2008-2013. Colony-based fieldwork at Kippaku and Apparsuit, NW Greenland. Aarhus University, DCE – Danish Centre for Environment and Energy, 58 pp. Scientific Report from DCE – Danish Centre for Environment and Energy No. 110 http://dce2.au.dk/pub/SR110.pdf

Eqikkaaneq

Baffinip Ikerani uuliaqarneranik misissueqqissaarnermut atatillugu Upernaviup avannaani 2008-13-imi aasaanerini timmissat imarmiut misissueqqissaarnernit sunnerneqannginnerini qanoq issusii misissuiffigineqarput. Misissuinerup annersaa qeqertannguami Kippakumi ingerlanneqarpoq, Apparsuarni qanittuaniittumi misissuinernik 2013-imi ilaneqartunik. Misissuiffigineqartut pingaarnerit tassaapput appat taateraallu. Paasissutissat katersorneqartut amerlanersaat timmissat paasissutissanik nalunaarsuussilertarlugit kiisalu assiliissutit imminut isumagisut atorlugit katersorneqarput saniatigullu alaatsinaalluni nalunaarsuinerit ingerlanneqartarlutik.

GPS atorlugu timmissanik taakkuninnga malinnaaviginninnermi paasinarsivoq erniornermik nalaani (juuli) neriniarfigisartagaat pingaarnerit tassaasut kangerluit qeqertallu kiisalu Baffinip Ikera 40 kilometerit tikillugit avasissusilik. Piffiit taakku ilaat imartat misissueqqissaarfissatut akuersissutigineqartut nalaanniipput. Timmissat misissuiffigineqartut taakku tamarmik annermik Newfoundlandip Labradorillu eqqaani ikkannersuarni kangianilu ukiisarput, kiisalu Labradorip Imartaani Davisstrædimilu ukiisarlutik.

2008-13-imi piffimmi misissuiffiusumi appat taateraallu erniortut pitsaasunik atugaqarsimapput. Siusissukkut erniortarput, angajoqqaavi ilungersungaartariaqanngillat, piaraat allilertortarput toqusortakillutillu. Taamaassusiat nerisagissaarnerannut takussutissaavoq (qularnanngitsumik annermik tassaasunik ammassaat eqalukkallu). Ukiut akornanni pissutsit assigiinngillat, 2011-imi 2013-imilu kingusinerusukkut erniorlutik qularnanngitsumik sikuernerata kingusinneruneranik pissuteqartumik.

Allaniit sunnerneqannginneranni misissuinernit paasisat siunissami uuliasiortoqalerneranit avatangiisilluunniit allatigut allanngornerannit sunniutaasunik naliliinissamut atorneqarsinnaapput. Kippaku Baffinip Ikerani timmissanik imarmiunik sivisuumik misissuinermi aallaavigissallugu naleqqulluartuuvoq.