Aarhus University Seal / Aarhus Universitets segl

Nr. 161: Onshore Seismic Surveys in Greenland

Kyhn, L.A., Wegeberg, S., Boertmann, D., Aastrup, P., Nymand, J. & Mosbech, A. 2020. Onshore Seismic Surveys in Greenland. Background information for preparation of Guidelines to Environmental Impact Assessment. Aarhus University, DCE – Danish Centre for Environment and Energy, 56 pp. Technical Report No. 161 http://dce2.au.dk/pub/TR161.pdf

Eqikkaaneq

 

Nunap iluani misissuisoqartarnera pillugu tunngaviusumik naalisakkamillu paasissutissiineq

 

Nunap sananeqaataata misissuiffiginiarnerani nunami sajuppillatitsisarnerit qaartitsisarnerillu avatangiisinut eriaginnittumik pisarnissaasa najoqqutassiornissaat sooq taamak pingaaruteqartiginersoq paasissutissiissutiginiarlugu akuerineqarsinnaasumillu qanoq periuseqartoqartarnersoq uani sammineqarput. 

 

Kap. 1. Nunap iluani kulbrinteqassuseq misissuiffigineqarniaraangat aalajangersimasumik pissuseqarluni nunap ilua misissuisoqartarpoq. Misissuinermilu periutsit assigiinngitsut atorneqartarput. Tamatigulli qinngorneq nunamut siammarterneqartarpoq, qisuariaataasullu immiunneqarlutillu naliliiffigineqartarlutik. Nunap iluani misissuinerit 2D, 3D imaluunniit 4D atorlugit ingerlanneqartarput. 

 

Periuutsit ullumikkut atorneqartartut sajuppillatitsilluni (vibroseis) imaluunniit qaartitsilluni misissuinerusarput. Vibroseis saattukujooq oqimaatsorujussuaq sajuppillatsinneqartarpoq. Saattukujooq taanna maligasakinnernik nunap iluanut ingerlatitsisarpoq, maligaasallu allaanerusunik apugaqaraangamik qisuariaatinik nalunaaruteqartarput nunamilu ikkussukkanut kabelilinnut kabeleqanngitsunulluunniit nalunaarsuinitik nassiuttarpaat. Qaartitsilluni misissuinerni nunap qaanut qaninnerni, 10 meterit missaannik ititigisumiittumi annikitsumik qaartitsisoqartarpoq, nunap iluai qisuariaatit nunap qaavani inissisimasunit tigoorarneqartarput.

 

Kap. 2. Avatangiisinut sunniutaasa annertussusaannut apeqqutaasarput periutsit sorliit atorneqarnersut qaqugukkullu misissuinerit ingerlanneqarnersut. Tamatigulli angallatit assakaasullit angisoorsuit oqimaaqisullu atorneqartarput, nunap qaavani ersittumik innarliisartut ingammik naasunik uumassusilinnillu, aammali nunamik qeriuannartumik innarliisartut, kuuillu kuunnerinut allannguutaasartut misissuinermi atorneqartarput. Nunap qeriuaannartup aanneratigut nuna kivisinnaasarpoq nakkaalluniluunniit. Taamatut akorngusiinerit issittumi ukiuni 70-ini atasinnaasarput ataavartuunatilluunniit. Taamaattoqartillugulu timmissat uumasullu annertuumik akorngusiiffigineqartarput.

 

Kap. 3 & 4. Nunatta Kangiani Jameson Landimi siornatigut nunap ilua misissuiffigineqarsimavoq. Misissuinerillu aasakkut ukiukkullu ingerlanneqarsimapput. Nunap iluata misissuiffigineqannginnerani, misissuiffigineqarnerata nalaani, kingornalu avatangiisit misissuiffigineqarlutillu alaatsinaanneqarsimapput. Misissuinerillu taakkua kingunerannik nunap iluanik misissuinerit ajoqusiisarneri annikillisarniarlugit iliuuseqartoqartalersimavoq. Ullumikkullu ajoqusiinerit annikillisarniarlugit arlalipparsuarnik atortussaqalersimavoq. Ilaatigut pineqarlutik angallatit qanoq ittut atorneqarsinnaaneri, aputip issussusaa, nunap manngissussaa (qerinera) ukiullu qanoq ilinera aallaavigalugit misissuisoqarsinnaanngorsimalluni. 

Kap. 5. Periusissanik najoqqutassiornerup siunertaraa misissuisoqartillugu pinngortitap sunnerneqarsinnaanerata annikillisarnissaa. ”Avatangiisinut Sunniutit Nalilersuiffigineqarnerat” (tuluttut EIA) suliarineqartassasoq siunnersuutiginerqarpoq. – imaluunniit ”Avatangiisinut ajoqusiisinnaanerit annikillisaaffiginiarnerisa naliliiffigineqarnerat” (tuluttut EMA) – nunami nunap iluanik misissuisoqarnialeraangat taakkua najoqqutarineqartarnissaat siunnersuutigineqarpoq. Ilanngullugu siunnersuutigineqarpoq suliffeqarfik tunngaviusumik misissuisassasoq, avatangiisinut annikinnerpaamik innarliisoqarnissaa anguniarlugu piumasaqaatit sorliit atuutsinneqassanersut naliliiffigineqarsinnaaniassammat.

 

Kap. 6 & 7. Pineqartumut tunngasunik arlalinnik saqqummersitsisoqartareerpoq. Atuagassat pingaarutillit pigineqareerput kalaallillu nunaanni misissuinerit aallaavigalugit nalunaarusiat allattorsimaffiat aajuna uaniippoq.