Aastrup, P., Raundrup, K., Feilberg, J., Krogh, P.H., Schmidt, N.M. & Nabe-Nielsen, J. 2014. Effects of large herbivores on biodiversity of vegetation and soil microarthropods in low Arctic Greenland - Akia, West Greenland and Southern Greenland. Aarhus University, DCE – Danish Centre for Environment and Energy, 40 pp. Scientific Report from DCE – Danish Centre for Environment and Energy No. 87 http://dce2.au.dk/pub/SR87.pdf
Nalunaarusiami tassani nunap uumasunit neriniarfigineqartarnerata piffissami sivisuumi qanoq sunniuteqarneranik misissuinernit paasisat eqikkarneqarput taavalu paasissutissanik ungalusanit neriniarfiunngitsunit neriniarfiusimasunillu katersuinikkut taakku pissarsiarineqarsimallutik. Paasissutissat nunap naasuinit, orsuaasaanit, qillinerinit, uumasuaraanit nerisareqatigiinnerinillu pisuupput, aammalu nunap inuussutissaqarneranit, suut uumassusillit nungujartornerannit nunallu kissassusianit pisuullutik. Paasissutissat taakku Kalaallit Nunaanni uumasut angisuut nunami neriniartuusut aammalu naasut akornanni imminnut sunneqatigiittarnermik paasinninnermut tunngaviliisuullutik
Nalunaarusiap imarai paasissutissat 2009 aamma 2012-imi katersorneqarsimasut kiisalu paasissutissat 1984-2004-imi Jon Feilbergimit katersorneqarsimasut.
Misissuinerit Kujataani Narsarsuup eqqaani aammalu Nuup eqqaani Akiata pisimapput. Kujataani sumiiffiit savanit (Ovis aries) neriniarfiupput, Akianiittullu tuttunit (Rangifer tarandus groenlandicus) neriffigineqartarlutik.
Ataatsimut isigalugu nunat nerruigisimasut nerruigisimanngitsullu naasui assigiissuteqaqaat – aamma ukiut 25-it sinnerlugit ingerlareeraluartut. Naasut ilaat nerruigisimasuinnarni imaluunniit nerruigisimanngitsuinnarni nassaasaasut aallaavigalugit malunnarpoq neriniartarneq naasut assigiinngissitaarnerannut sunniuteqartarmat. Orpikkat naasullu ivigakkuunngitsut ungalusani amerlanerupput, aammalu uumassusillit kingunikui amerlanerullutik.
Nunat nerruigisimasut nerruigisimanngitsullu inuussutissartaat assigiingajalluinnarput, aammalu Kujataani Kitaanilu inuussutissaqassuseq assigiilluni.
Ataatsimut isigalugu nuna nerruigisaq kissarnerusarpoq aammalu nunap 0°C inorlugu kissassuseqartarnera Akiani Kujataaniit sivisunerusarluni.
Uumassusillit kingunikuisa nungujartornerat Kujataani Kitaaniit sukkanerujussuuvoq, kisiannili Kitaani Kujataaniluunniit nunat nerruigisimasut nerruigisimanngitsullu akornanni assigiinngissuteqarani.
Nunani nerruigisimanngitsuni uumasuaqqat assigiinngissitaarnerupput.
Paasissutissat pissarsiarineqarsimasut uumasut neriniartarnerisa, uumasut assigiinngissitaarnerisa aammalu issittup kujasinnerusuani silap allanngoriartornerata akornanni pissutsinik misissueqqissaarnissamut periarfissiilluarput. Paasissutissat katersorneqarsimasut sukumiinerusumik misissorneqarpata siunissami issittumi uumasut neriniartarnerisa sunniutissaat nutaamik ilisimasaqarfigineqalissaaq.
