Aarhus University Seal / Aarhus Universitets segl

No. 243: Miljøundersøgelser ved Mestersvig 2014

Aastrup, P., Bach, L., Søndergaard, J. & Gustavson, K. 2018. Miljøundersøgelser ved Mestersvig 2014. Aarhus Universitet, DCE – Nationalt Center for Miljø og Energi, 36 s. - Videnskabelig rapport fra DCE - Nationalt Center for Miljø og Energi nr. 243. http://dce2.au.dk/pub/SR243.pdf

Eqikkaaneq

Nordisk Mineselskab ukiuni 1956-63-mut Tunup avannaani Mestersvigip eqqaani qaqqami aqerlorsiorfimmik zinkisiorfimmillu ingerlatsivoq. 1979-imi pernaammik avatangiisit misissuiffigineqarnerisa kingorna arfineq-marloriarluni misissuisoqartarpoq. Nalunaarusiami matumani misissuinerit kingulliit 2014-imi ingerlanneqart nassuiarneqarput, kiisalu tamaani siusinnerusukkut misissuisarsimanernut sanilliussinerit aamma nassuiarneqarlutik. 2014-imi misissuinermi misissuiffigineqartut tassaapput sissami sioqqani imarmiut, Umiarsualivittaami marraq, qeqqussat, kanassut kiisalu tarajoq, aammalu nunami ujaqqat naaneri qillinerit kiisalu imeq misissuiffigineqarlutik. Misissuinertigut paasinarsivoq aatsitassarsiorfiup matuneraniit ukiut 50 qaangiutereersimagaluartut aatsitassarsiorfiup eqqaani, aatsitassarsiorfittaamiit Sulloqarfiup kuuata avalequtaata kujataani Umiarsualivittaamut aqquserngup qiterpasissuani eqqaani qillinerni kiisalu nunami sissamilu sioqqani, marrarmi, kanassuni qeqqussanilu qaffasissut.

Aatsitassarsiorfiup eqqaani mingutsitsinerup aallaavigisaa tassaavoq aatsitassarsiorfiup ateqqajannguani akuiarnerlukunik eqqaavik. Aqqusinermi mingutsitsineq puunit akuiagassanik imalinnit pujoralaat siammarnerinik pissuteqassasoq naatsorsuutigineqarpoq, taakkulu aatsitassarsiorfimmiit umiarsualivittaamut biilersuarni ammasuni poorsuarnut immiullugit 1956-imiit 1963-imut assartorneqartarsimapput. Sullup kuuata avalequtaata kujataani nunap akuisa qaffasissusiat sumik aallaaveqarnersoq ilisimaneqanngilaq. Imaassinnaavoq pooq biilersuarniit katataasimassasoq, imaassinnaavorli nunami nammineq tamaani aamma akoqareersimassasoq.

Sullup kuuata avalequtaani aatsitassarsiorfiup eqqaani akuiarnerlukuusikkoortumi uuttortaanerit takutippaat imeq aqerlumik zinkimillu suli akoorneqartoq, taamaalillunilu aamma kangerluk tassuuna mingutsinneqartarpoq.Aammali uuttortaanerit takutippaat Sullup kuua assorsuaq imerpallatsitsisartoq.

Umiarsualivittaami nunami mingutsitsineq assartuinermi usilersuinermilu puuniit aniasunik pujoralatsitsinermik pissuteqarsimassagunarpoq. Kangerlummi prammit talittarfimmiit umiarsuarmut kisarsimasumut assartuutaasut mingutsitsisarsimapput, kiisalu umirsualivik iseqqasimasoq aamma mingutsitsisarpoq. Mingutsitsinerup aallaavippiaata annertussusia sumerpiarlu innera ilisimaneqanngilaq.

Mingutsitsineq 1991-ip missaaniilli aalaakaasumik annikilliartuinnavissimammat malinnaavigeqqinnissaa pisariaqarsorinanngilaq. Kisiannili mingutsitsinerup aallaaviata annertussusia sumiissuserpiaalu ilisimaqqissaarneqanngimmata mingutsitsinerup appariartornera ilumut ingerlaannassanersoq qularnaavinneqarsinnaanngilaq. Nutaamik mingutsitsisoqalernera paasineqariasaanngippat avatangiisit ukiut 8-12 qaangiuppata misissuiffigeqqinneqarnissaat kaammattuutigineqarpoq.